ROCK IT! Love Mi 2009

我而家心情仲係好hyper呢!!
啱啱睇完sammi的concert, 超正呢!

Sammi係我中學年代的偶像, 最熟佢叮噹以後的歌
當時我死慳死抵買佢嘅CD, 然後在屋企狂煲
(比起而家用電腦聽歌實在好多)
學佢唱腔, 由娃娃看天下, 不拖不欠, 捨不得你, 放不低,
默契, 小心女人, 一夜成名等等等等, 當年我都學到八九成
而家唱K仲有朋友叫我表演, 哈哈!
不過我覺得已冇當年咁似, 而且人大了面皮也薄了
要我模仿sammi腔會很害羞呢

今次concert我並沒有抱太大期望會好似2007的那麼好
雖然佢今次跳舞無上次咁癲, 但跳舞那part依然係最精彩的
我同個fd and全場觀眾都跳到癲左
而慢歌都好動聽, 全晚無廁所位
即使剩番半把聲的我都冒住再度失聲的危險
盡力嗌破喉嚨, 盡情跟sammi載歌載舞
太high啦, 而家喉嚨又如火灼, 聽日大概又會無聲
不過, 仲好, 返工大條道理唔聽電話了, 嘿嘿

成晚令我最感動係sammi好誠懇分享當年拍長恨歌生病的事
其實活喺現今的香港, 多多少少你或我體內都潛伏了一些情緒病
只是程度深淺而已, 什麼時候爆發而已
我承認我有些抑鬱症…有時嚴重d, 有時又好似無乜嘢
這個病最恐怖是在不自覺的情況下令人陷入崩潰狀態
有時會質質疑自己的存在價值
即是坐巴士時, 我望著街, 然後眼淚無故的在流
自己也不知為了什麼而哭
我現在很想買她的”值得”來看看呢

我還是不要那麼沉重, 都係同大家share今晚影的相, 讓大家羨慕下吧, 嘿嘿
以下部份相係朋友的男友幫忙拍的, thank you an san!


ready to rock the show!!


無錯, 我9:00位置係梁家輝, 好鬼型呢!


i like this look the most!


sammi featuring 24 herbs. 搞到我好想睇LMF


sammi featuring MC yan


sammi in shocking pink!

i like avatar, but hate the christmas 2009...@@

今日終於買到飛睇阿凡達

話說之前並沒有那麼期待要看阿凡達的
因本人對科幻特技片一向興趣不大
而且唔鐘意睇假嘢...
不過說來荷李活片有邊套唔用特技...
包括titanic的那片汪洋大海都係假的
那麼我該把剛才的話修正為
"我唔鐘意睇我肉眼能辨別的假嘢"

但網路上, blog友, 朋友間都吹捧著阿凡達...
講到比預期中好睇, 如果唔睇好似好笨...
加上對james cameron的情意結
我想看看繼titanic之後佢點造就另一波經典
怎樣刺激影迷的視覺神經
即使一張飛可以睇兩場戲我都豪俾你!

睇完之後真係無得頂, 假可亂真...
那些藍色土著真係型
真佩服班底的想像力和創造力啊!!
看完我覺得人應該和大自然和諧相處呢
這點我不想詳談, 留待你自己入戲院意會

講番呢個聖誕節...應該是我最黑仔的聖誕吧!!
我竟然放假先來病!!
其實普通傷風感冒我都會頂硬上的
但今次唔知邊度惹d重感冒
最"金"係病到對眼又紅又腫, 大細眼
總之樣衰到爆, 見到鏡要調頭走...唉
所以24號我結果係足不出戶, 無出街!!!!慘慘慘!!嗚嗚

今日我見對眼無咁腫, 就唔理咁多衝左出條街先
可能之前兩日我已瞓左好多, 今日行極都唔倦
同早兩日成條喪屍實在大大對比
不過唔知係咪講嘢太多, 定食風太多
而家把聲由原先的鼻塞聲變成無聲...
講兩個字就走音繼而無聲...
哇, 咩料?!
後晚我仲要睇sammi, 要同佢大型卡啦ok喎!
唔知呢兩日會唔會有番聲呢?
god bless me...amen

我看"吟遊世界"

首先唔好笑我無聊先...
(自己已很想笑, keke)

話說之前我好欣賞星光6的蘇芷妤
於是我就上網search關於佢的info
對唔住, 我承認我呢個行徑是很無聊的
幾廿歲人仲做埋d迷偶像事件
仲要迷一位十幾歲的TB...
自己也感到匪夷所思...

anyway, 我係摷到佢的blog, 本來諗住八下就算
點知, 越睇越好睇喎...後來仲bookmark左tim
真係無諗過佢成個邊青咁款都寫得一手好文
雖然佢會寫d所謂"沒有營養"的文字, 但我都覺得很有重點
相對我的blog, 我的那些真的很垃圾呢

雖然台灣人英文唔好, 但佢地中文好嘛
以前的台灣同事都以為我的英文好勁
三歲學英文仲唔係成個西人咁
但係...我同普天下的港人一樣, 中英文都很不濟...
虧我地細細個就學兩文三語..shit!

有時間又有興趣就睇下啦 http://www.wretch.cc/blog/a6071045/

對自己好一點...

友人M最近頻頻打俾我問
那隻牌子的eye shadow好? 那款包包比較美?

想告訴大家, 友人M是位很慳家的優質女生
講起來其實都幾慚愧
我地同年畢業, 但佢而家已儲到一舊足夠俾首期的錢
而且仲預留一舊可觀的cash flow
我成日問佢點解可以儲到咁多錢
調番轉佢成日見我每個月無錢剩都好匪夷所思
係啊, 我那個月無洗凸已算阿彌陀佛...

但, 友人M最近一反常態, 頻頻燒銀紙...
我問佢咩事, 係咪拍拖或者有人approach緊啊?
佢又話唔係喎, 只係想對自己好d
我真係唔信...一定有d嘢先會想得出要對自己好

anyway, 你係好女仔, 我希望你得到幸福快樂! ^^

我們都累了...

成日以為自己又捱得又忍得, 而且擔得又抬得
多辛苦的工我都會撐過去, 有咩自己係頂唔住?
到今日, 我真係覺得好攰...

我唯一的同事今早打俾我
以前我好怕聽佢電話,
但今日我竟然有種同佢相依為命的感覺
佢話今日有種好想辭職的感覺
當然這是我們之前傾左好多嘢而得出來的conclusion

心情真係好差, 啱啱望住個飯盒都係灰色
我都唔知頂到幾耐...

我愛台灣星光幫

就算無線亞視點"練", 又超級巨聲, 又亞洲星光大道
我覺得都唔及台灣中視的超級星光大道咁好睇
首先香港主持冇陶晶瑩, 然後評判又冇張宇, 黃韻玲...
得個唔知up乜的邦邦, 仲要被封金句王...
句句廢話都唔知邊度撈到句金句?
勉強肥媽, miss chan chan都ok...
而重點係, 香港冇乜唱得的人, 又或者令人好impressed的參賽者
係有幾個好落力咁唱到面容扭曲颷高音...
但唔好聽, 又扮嘢...
可觀性真係好低

我都係鐘意台灣的星光幫
林宥嘉, 周定緯, 徐佳瑩等等等等
個個又唱得又跳得又寫得!!
最近星光6殺出另一名新丁, 蘇芷妤
佢係繼林宥嘉之後, 另一位令我覺得一鳴驚人的唱將
希望佢捱得過呢個長途賽!! 我會支持佢的!!!

"唔等洗"的名牌...

上星期日wyman在buy me a Sunday介紹左幾件”唔等洗”的名牌product…
一齊睇下...


呢個gucci冰格真係無聊之最…唔講我以為係我姪仔玩的積木遊戲
係咪加左”G”冰屋企那杯利賓納會升呢為四季那杯cocktail呢?


呢個chanel壺幾實用, 不過嫌佢行左d
我自己都可以界個孖C周圍貼話係chanel波凸


同wyman一樣, 我最喜歡呢套prada旅行套裝
“唔等洗”得來又靚又實用

其實我覺得花得起錢買呢d”唔等洗”嘢仲勁過花幾球嘢買個袋
好似wyman咁有錢我都唔介意買多幾件無聊名牌嘢返屋企

如果有天我買得起”唔等洗”的名牌嘢時
我想要個chanel M巾袋…:P

忍

今天給自己的金句:
凡事都要忍! 遇到什麼不如意的事都要忍下去!!!

12/12 無聊事...

巧遇英皇歌手
今日返學校同朋友影畢業相
影相之前我到本部辦點公事
辦完之後我急步從一堆二堆人群中離開時
突然撞到位好熟口面的英皇歌手
我試圖諗起佢嘅名字…諗到頭都爆都諗唔到
當佢個名仲未揭曉之前佢對我親切的一笑, 然後我也禮貌地回他一個笑
而家咁大個人撞到artist好冷靜架啦, 唔會好似0靚妹時咁瘋癲…
不過俾我遲出世十年撞到呢位artist, 我諗我都未必嗌佢
因為那人正是吳浩康…

==================================================
博一舖?
又講番今日返學校影相的事…
影影下咁啱撞到老細…
朋友就在我耳邊說,
“你老細一睇就知你做唔長啦”
跟住又話
”學校做嘢的人好純樸…你…”
想點啊…….
我唔抵得回了一句”抵得過老細請我, 哼!”
跟住友人又回我一句 “你老細都係博一舖”
呢段對話真係幾頂癮…不過我都贊成, 其實大家都係博一舖…haha

=================================================
貪靚???
今日到底發生咩事? 唔通我貪靚貪出腸?????
竟然不約而同俾兩位友人話我貪靚?!
首先早上友人M打俾我話黎唔到影相啦
我咪答查實我都唔會跟全程, 之後要去剪頭髮&做colour…
因為就快聖誕節…不過我聖誕又未有節目, 整定先咁解
友人M就話, “根本你就係一個貪靚的人!”
Oh…就算唔係聖誕節都要剪下頭髮做下colour架啦…好貪靚咩?
跟住夜晚整完個頭, 去toilet搽番個咀
同行的友人G就話都食嘢啦, 仲搽, 真係貪靚…
OH MY GOSH!!

其實貪靚唔係罪…只不過我對呢個詞有d抗拒
平心而論, 我真係唔算貪靚呢…
平時toilet照鏡, 我都係係咁二望下就算
次次我都要企埋一邊等fd照完先走…

可能友人M&友人G未見識過比我更貪靚的人,
一山還有一山高喔…haha

還是舊的好...

(某天攝於中環石板街)

推陳出新當然是好事
但我不認為所有事都是舊不如新
相反, 舊的好有時是可一不復再…
以下是部份例子…

Agnes b.
我喜歡Agnes b.的舊款布袋, 簡簡單單但很型…可惜當年無錢買…現在的太fancy了, 又螢光紅, 又大粒星, 又ab-monogram…it’s too much…有點走火入魔…大概很多牌子都落得如此下場

周杰倫
近年搞作太多的周董, 我開始搞不清他是唱歌出身還是打功夫出身的周大導…我還是喜歡當年戴鴨舌帽, 把帽子拉得很低遮住眼睛, 帶點害羞唱著可愛女人的周杰倫…第一張”Jay周杰倫”仍是我最鐘愛周杰倫的專輯

中環
喜歡從中環石板街剷上去一帶有血有肉有歷史的舊街道, 舊建築, 喜歡穿插於奧卑利街的中環警署, 鴨巴甸街的舊警察宿舍, 又喜歡鑽進歌賦街食地踎得很的九記牛腩, 排檔檸檬脆脆…ifc起得再高只讓我感到高不可攀, 冷冷冰冰

逝去的時光
我最懷念的, 還是小時候未懂事的時候…雖然當時很窮, 但我窮得快樂…因為我不知道不快樂是什麼…現在長大了, 賺錢了, 但買不回小時候的快樂、純真…

太多了...往事, 只能回味…

不變的午餐...

同同事出街食lunch時, 見他們彷彿得了選擇困難症
望住個餐牌諗好耐都唔知自己想食乜…
我呢, 好少有呢個問題, 因為我來來去去都係食同一個餐
即是美心就食燒味
麥當勞多數食魚柳包餐
小魚就食雞扒米線
御麵就食醬汁豬扒米粉…
我又唔係真係懶得諗
只係食開一樣好味就唔想轉
唔駛怕我食到嘔食到悶
我係食極都唔厭咁款架喎

無錯, 我只窮一生的專一在我的午餐裡
其他? 我花心得很…哈哈

任性的事...

心情突然好差, 於是想出一堆任性的事發洩
我想…

1. 劈炮唔撈! 話之佢幾時先搵到工
2. 買張機票去巴黎流浪一個月, 之後玩埋附近的國家...無bugdet limit
3. IT, Lane Crawford, Chanel, Miu Miu…etc入到去合埋眼唔駛睇價錢任掃衫褲鞋袋
4. 狂食薯片, 喪食半島buffet, 理得佢爆瘡定暴肥
5. 落老蘭劈至爛醉, 跳舞跳至頭甩
6. 包左個K場, 任我唱到聲沙嗌cut為止 (其實兩個鐘左右都KO左…)

如果我有本事做齊以上的事, 我就死而無憾了...
諗完以上心情好似好少少…
是的, 我份人有時幾阿Q的

實至名歸!

恭喜鄧萃雯實至名歸!!
無線今年終於做番件反映民意的好事
真係戥雯女開心, 呢個獎係黎得遲左
如果今年再失落俾其他姐仔
恐怕粉絲唔止遊行咁簡單, 炸埋個電視城都似
不過我都想讚下楊怡夠大方
攞視后係遲早的事

講番雯女, 佢今年搵左wyman做佢stylist
wyman真係勁, 經佢點化過的雯女即時chic好多
我鐘意雯女最近出席活動的打扮
雖然有報紙話雯女頒獎禮上穿的Monique Lhuillie太樸素
但我覺得okay喎!
行紅地毯唔一定要坦胸露臂, 或者條裙尾長到唔知去到邊先啱數…
太公式化反而會顯得俗套
我都係鐘意型格得來顯出個性的打扮!

愈怕面對的事愈要克服它

“愈怕面對的事愈要克服它”
是我今天用來勉勵自己的金句…

最近遇到麻煩的事多不勝數
問題愈複雜我愈想逃避
採取拖得一時得一時的策略…
不過問題自己不會解決
始終都要做嘢…唉

我都唔知那裡來的力量
突然”愈怕面對的事愈要克服它”呢句嘢浮在我腦海裡
我如有神助般充了電…
一股勁兒處理一d囤積的問題…

雖然問題最後未必識解
但至少, 我有番些少衝勁先….

無奈的事如星塵那麼多...

有次朋友問我近況, 新工做成點
當我話俾佢知, one-man band
Office寄居別人家裡
佢即時瞪大眼問我, 做乜我成日做呢d工?!

是的, 數年前我在one-man band公司混過三數年
環境同而家差不多, 又係寄居於唔屬於自己的地方裡
出面d”地主”成日當我是要來侵佔他們土地的土匪…
而且地點又係沙田區!!!

好不容易, 之後投靠到較有規模較正常的office裡工作
而且, 再不是沙田區了
可惜, 因timing原故, 也是命運驅使吧…
我又返回沙田工作…

我想嘆一句, 天下間令人傷心無奈的事猶如星塵那麼多...
不要再問我點解又做one-man band…
我都想知點解我又要返沙田工作!
是我揀的嗎? 我倒認為是工作選擇了我
天意弄人!

聽別人說話

話說今日我去銅鑼灣拎貨
拎貨之前我醒起好耐冇食榮記車仔麵
於是拱左去食

其實我唔係想講車仔麵的事
只係想講同我同桌食車仔麵的那對夫婦
首先老婆, 佢唔算靚女, 勝在皮膚白白淨淨
說話帶輕微鄉音, 估計唔係香港人
而老公, 普通男人一個, 粗粗地但唔算麻甩

老公問老婆點解今晚食車仔麵
老婆向老公大撒嬌媚答:
“我諗住聽日要返工, 睇唔到九點半, 咁食車仔麵咪可以睇七點半咯,
你話係唔係啊? 仲有啊, 我地睇完七點半仲可以去篤鴨腎喎…”

跟住老公又問老婆, 仲叫唔叫嘢食, 老婆好配合咁答:
“好啊, 你叫啊, 我陪你食…”

請大家讀以上對白時加點想像力, 將老婆的音頻調到最嬌最姣就對了

其實我記性唔係特別好, 無專登記佢地嘅對答
我亦唔係無聊到好想聽佢地講嘢
只係坐佢地對面, 硬塞到我耳朵裡來

其實我想講呢,
夫妻間相敬如賓無壞geh…
不過佢地客氣到令我覺得有點生疏, 尤其老婆
溫柔體貼亦無不可, 只係我唔受嬌嗲那一套
聽老婆講得耐, 我覺得有點煩厭…
只是老公雖然話不多, 但顯得很受落…
唔通天下間的男人都喜歡呢type?
我諗我呢世女都姣不出什麼勁來…

仲有, 我覺得老婆呢類人好危險
我形住佢係那種反轉豬肚就係屎的惡毒女人
Sorry, 我係咪諗多左?

和sales做朋友

唔知係咪我買衫時太豪氣
還是個sales太濫情? 鐘意同d客扮friend搲生意?
我買衫時總會遇到salesman/lady fd
當我下次再去, 佢地又會介紹new arrival item俾我
直情做埋我嘅stylist!

其實同sales fd有好有唔好
唔好就係有時佢地嘅熱情會令我感到壓力
尤其當我諗住運吉那日, 我一定唔會去拜訪
個sales一邊跟住sell, 我又一邊諗理由推
呢場角力令成個shopping都變得很沒趣

不過有d sales好好的
我呢d cheap人, 唔減價都唔捨得買嘢
所以佢地會減價時call我
仲幫我keep起左之前我睇啱但唔捨得買的衫

anyway, 識多個朋友冇壞, 尤其那些好人sales :)

肥肥瘦瘦肥

最近我又變得暴食
可能是壓力, 壓力時常將我推向兩個極端
一係無胃口食, 一係喪食
呢種病最克人憎的地方係
你明明唔餓都要搵d嘢嚼
愈唔俾自己嚼就愈想嚼
嚼完又會內疚吞左d嘢落肚…
所以我要將呢個病寫出來警惕自己
再暴食落去, 要返轉頭就好難架啦!

P.S.
其實我又唔係artist, model, 瘦黎唔知為乜…
啊~~~抓狂中...

畫畫

原來我學畫畫差不多一年了
這算是我少數能維持那麼久的興趣呢
無啦啦點解學畫畫呢?
因為…我要做個有氣質的人haha, 係咪笑死左??!!

其實我細細個已朝住氣質女生呢個方向發展
只是我份人無耐性兼經唔起錯折
事情就敗在得唔到滿足感就唔玩啦
當年學小提琴如是, 學瑜珈也如是…
小提琴還來不及拉得出神入化,
練瑜珈又未練到將對腳擺到上個頭頂我就放棄了

培養一種興趣/技能真係唔容易
所以我特別尊敬做事專注的人
只有他們才能成為有氣質的人

這次呢, 我真的很俾心機學畫畫
唔知你地有無發覺我個人有氣質左
但對自己來說, 這次算是我人生中做得比較有頭有尾的事
總算是對自己一個交代啦

我畫畫沒有壓力, 老師又不會從旁逼迫
我喜歡學習的過程, 希望一直畫落去…


1st painting: sunset


2nd painting: hokkaido


3rd painting: cloud floating in the air


4th painting: rose


5th painting: calla lily for my cousin


6th painting: tulip

飛飛飛!

(攝於朱家角07/11/2009)

11月除了生日令人開心之外
最開心莫過於出走飛一轉
月初趁完成新職上任後首個project
我和朋友飛上海玩了三天
吃喝玩樂當然唔少得, 就連方大同的concert都睇埋
老實說, 那三天比上班還要疲累
不過, 沒有那三天, 我又如何撐以後的日子?
你會買衫, 買鑽石, 買車tum自己開心
我去旅行, 都只不過是tum自己開心

所以, 不要數算我一年飛了幾多轉吧
快樂是無價的, 我會繼續秉承being a no feet bird的宗旨
周遊列國, yeah!

生日快樂

自上星期六開始, 我一直奔走朋友為小弟設的生日飯局
真係星期一食到星期七, 食到肚滿腸肥

雖然我不是一個很sweet的人
但身邊總有對我好多於我對他們好的好朋友
相信這是自己上幾世積回來的福

就算我們不是吃什麼大茶飯
不是搞什麼聲勢浩大的派對*也好
簡簡單單食餐便飯吹下水
俾個藉口我見下你地, 呃餐飯仔食已心滿意足!
(*註: 前幾年我聽過朋友參加了某人的bday party, 嗰位”某人”真係阿茂, 佢根本唔識主人家, 只係fd搭fd搭fd, 搭左幾廿重參加一個陌生人的BDAY PARTY! 佢話當去一個party識下朋友咁…有年, 朋友想幫我搞呢類party, 大佬, 多左d三唔識七的人我仲驚!)

年紀大左, 自己對自己的生日的感覺日漸遞減
雖然我會叫朋友唔好破費為我慶生
但當朋友相繼sms, FB, email, 電話邀約時
我心裡又點會唔甜在心頭呢?
不想人家破費, 只是我為擔心有一日朋友沒有興緻陪我過生日而穿上避彈衣
若然朋友真的忘記了, 我也不至於要砍頭埋牆
講到底我就是那樣沒有安全感的人, 凡事打定輸數, 贏了當bonus

多謝晒! 還有你們透過唔同渠道送我的祝福
我一定會牢牢緊記在心中!

上海婆婆

之前在openrice見上海婆婆的食評不錯
所以今晚同朋友到那邊八卦下

上海婆婆的選址可算是”這麼近, 那麼遠”
它遠離旺區如尖沙咀旺角, 但又貼近民區如九龍灣
(分店位於屯門, 荃灣, 葵芳, 美孚, 將軍澳, 九龍灣)

我一向認為開在民區裡的餐廳總不及旺區好
但這個上海婆婆打破了宿命
由裝潢至食物都是一級棒, 價錢又合理
我一坐低就被那幾幅BB巨型油畫吸引
個個BB塊面都肥嘟嘟
食物方面, 一點都不馬虎
簡單如皮蛋豆腐都可看出師傅的好刀法
而那個蔥油餅不油不膩, 咬落去有嚼勁
另外, 那個黃金四季豆未食已香氣撲鼻
其實仲有好多嘢想食
所以已諗住下次再約朋友去食了
Yummy~~


d肥BB好得意啊!勉強地總算跟他們合照了:P


皮蛋好味之餘, 請留意d豆腐幾薄! 我自己一勺就散, 難得師傅片完仲原孔無缺, 厲害!


黃金四季豆好香口!


唔記得左個名啦...但d肉丁加上松子再配合個包, 味道很好!

給自己的序

這已是我第三個blog了

我的第一本日記今天還在
當年我還是用那種有鎖的日記簿
非常old school吧…
雖然這本日記已有十多年歷史
但現在再翻開, 裡面每隻字仍是流露著有血有肉的情感

零三年, 我在ShowHappy.net開了第一個電子版日記
blog慢慢成為我在網上宣洩情緒的平台
由於當年寫blog還不及現在流行
所以我肆無忌憚鬧人, 包括公司上下, 非常暢快

直至零五年, ShowHappy.net已不能滿足我
我在Multiply繼續開火
經過幾次闖禍後, 我漸漸學乖, 明白到不是任何事都可以在網上坦蕩蕩地說
網絡世界只不過是圍繞足球一圈那麼小,
寫blog再不能讓我暢所欲言,
每寫一字, 都擔心犯了文字獄或得罪了某人
所以近年我很少寫blog了, 只是偶爾放些無謂嘢上網

正當我想靜悄悄撤離blog界
瘋go鼓勵我在blogger開blog
佢話呢度熱鬧d, 又可以同各界”卜友”交流
所以我就在24/11生日這一天在blogger開張
開張是開張, 但我不會因此而濫造文章
始終寫blog這回事還是隨心比較自然

各位blogger, 以後請多多指教了!

MJ FOREVER

就算全香港的人都忘記了MJ

(須知道香港人係幾咁善忘的一群…)
尖沙咀還有一間CD舖日夜播著MJ生前的演唱會
每次行過這間CD舖都不其然望一望MJ的moon walk
呢間CD舖好有趣, 正如好多賣毛巾, 賣底衫褲的短期租約舖頭
成日嗌執笠, 但執極都仲有, 但狼終有一天會來的

能夠鍥而不捨的播放MJ的演唱會,

而放棄播放熱門電影作宣傳
我不排除這也是宣傳技倆之一,
但更多的是老闆對偶像的一份尊敬和紀念
所以我希望狼不要來, 舖頭不會摺
希望佢長做長有, 將這份堅持延續下去

HAPPY BIRTHDAY

Happy birthday煒倫寶寶豬

祝你快高長大, 聰明伶俐, 英俊瀟灑,

玉樹林風, 風流倜儻

新開始

返左一星期新工, 感覺很新鮮呢

不但環境優美d, 空氣清新d

而周圍的人幾乎都是學生和教授
我感覺是上學多於上班…

另外, 呢個禮拜, 在下的運動量絕不少於一年的總量

由於老闆或各行政單位都散落在不同的大樓
我經常要走來走去, 而學校內的人又習慣行樓梯多於搭電梯
再加上天氣熱, 戶外走動令我出了很多汗
過往幾年我彷彿是雪房裡的一舊凍肉

沒有走動, 每天躲在冷氣間工作

經過這個星期後, 我的肌肉變得結實了點, 而褲頭也鬆動了一點點呢
這應該是我出了一身臭汗後最開心的事了

這個星期我只踏足過學校的一少部份
以後希望可以發掘更多地方, 同埋好味又抵食的canteen

最後一天

經過多番折騰, 最終我還是離開了

除左少數要好的同事外, 大部份同事都是喺我last day嗰日先知我走, 佢地都好驚嚇
我的確有點故意的, 因為我係唔擅於表達同控制感情的人
我怕一早講左, 佢地會講一d觸動我淚線的說話, 又或者破費為我箋行..
所以我低調地用自己認為舒服的做法處理左

雖然之前恨不得早點離開, 但臨走一星期我還是有點不捨

我唔捨得戰友們, 唔捨得熟悉的環境
四年了, 不是一點感情都沒有

明天要重新開始了

祝明天會更好!

一個人在東京

一個人在東京的感覺是什麼?我認為是很自在

那份自在是即使在香港一個人看戲

或一個人在台北誠品看書都沒有的自在
 
由於新工作報到前得到幾天意外的假期
於是急急腳計劃出走飛一轉
因時間太趕的關係, 大概沒有朋友肯陪我癲, 話飛就飛
所以, 在種種因素底下, 我選擇了一個人飛東京

雖然之前去過, 但今次係第一次孤身隻影的去一個言語不通的地方, 你話唔驚就假,

咁啱, 出發前幾天, 有新聞話東京會發生大地震, 真係驚上加驚

(拍攝於井之頭公園通往吉祥寺駅的小徑)

嗰一刻先發現自己是一個貪生怕死的人,

仍然留戀凡間的生活, 因為我仲有好多嘢未做, 好多地方未去…但既然有假期就無謂浪費…

於是我抱住一種睇恐怖片, 驚又要睇, 勇字當頭的一股勁兒飛了…

出發前心裡更默默祈求上天俾多少少時間我留在人間, 俾我安全歸來

結果, 當我腳踏東京這片土地之後,

之前的所有憂慮幾乎忘記得一乾二淨

我想東京, 甚或整個日本都是一個自閉的國度
即使你在那邊一個人逛街, 一個人吃飯都是一件很自在的事
我直情融入左成為佢地一份子, 唔出聲基本上冇人知我係遊客

我真的很嚮往那幾天在東京的生活

香港這邊惱人的事情統統拋諸腦後
每天的”工作”就是周圍逛, 周圍食, 周圍望
請問天下間有什麼工作能比得上呢?

如果下次要我再自己去東京, 我也是十萬個願意!

化妝

我第一次化妝應該是中七畢業以後女仔化妝大抵是為了貪靚吧
而我, 由細到大化妝的目的只有一個, 遮瑕!

那麼, 這些年來我化妝的分別在於哪?

不在於化妝的技巧出神入化, 而在於要遮的範圍愈來愈大
撻上塊面的粉愈來愈厚, 搞的花款也愈來愈多
以前唔畫眼線的我, 自從有一日畫左眼線發覺搵番對眼之後
以後如要出席一些不能太失禮的場合, 我都會整番條線

化妝有如染上毒癮

一日”high”左佢, 以後都好難搣得甩
而且, 化妝那舖癮會愈來愈深…
總之, 人前人後, 都以最佳妝容示人
第時可能連落街買棵蔥都要搽粉底…

真羨慕王菲那些即使素顏都可以示人的人喔!